Геофизикийн салбар 24 зөвлөх инженер, 26 мэргэшсэн инженертэй

Геофизикийн салбар 2023 оны 11-р сарын 28-ны байдлаар нийт 24 зөвлөх инженер, 26 мэргэшсэн инженертэй байна.

Доктор, Профессор Пүрэвийн Дугараагийн нэрэмжит геофизик, геомэдээллийн боловсруулалтын танхим

Монгол Улсын Шинжлэх Ухаан Технологийн Их Сургуулийн

Геологи, Уул Уурхайн сургууль

Доктор, Профессор Пүрэвийн Дугараагийн нэрэмжит геофизик, геомэдээллийн боловсруулалтын танхим

/2023-11-17-нд нээлтийн үйл ажиллагаа нь болсон/

Монголын Геофизикчдийн Холбооны Удирдах Зөвлөлийн гишүүн П.Дугараагийн товч тайлантай энд дарж танилцана уу

Геологийн том экспедицүүдийг татан буулгаж, хувьчилсан зах зээлийн шилжилтийн үеийн дараахь хүнд хэцүү он жилүүдэд мэргэжлийн байгууллага, ажилтан, ажиллагсдын эрх ашгийг хамгаалах, шинэ залуу боловсон хүчин мэргэжлийн залуу халааг тасралтгүй бэлтгэх, сургалтын материаллаг баазыг бүрдүүлэх, салбарын нэр хүндийг өсгөх, ахмад дунд үеийн тэргүүлэх мэргэжилтнүүдийн алдар гавьяаг дуурсгах, мөнхжүүлэх, дэмжих талаар өөрийн мэдлэг, оюун ухаан, хүч чадлаа бүрэн зориулж, үе үеийн ахмад, дунд, залуу үеийн геологичид, геофизикчдийг холбох гүүр болон ирсэн ШУТИС–ийн ГУУС-ийн Сургалт үйлдвэрлэл, судалгааны төвийн захирал, Монголын Геофизикчдийн холбооны дэд тэргүүн, Удирдах зөвлөл, Хяналтын зөвлөлийн гишүүнээр удаа дараа сонгогдож, 1997-2009 онд холбооны гүйцэтгэх захирлаар ажиллаж байсан Монгол Улсын Зөвлөх инженер, доктор (phD), профессор П.ДУГАРАА багшийн мэргэжлээрээ ажилласан 56 жилийн сүүлийн 30 жил буюу түүний амьдралын идэвхитэй үйл ажиллагаа Монголын геофизикийн холбоо (ГҮТББ)-той салшгүй холбоотой байсан.

Геофизикийн салбар 2 мэргэшсэн инженерээр хүрээгээ тэллээ.

ГЕОФИЗИК-ийн мэргэшсэн инженерүүд 2023.11.17-ны өдөр Мэргэшсэн мэргэжилтний ёс зүйн тангаргаа өргөж, эрхийн гэрчилгээгээ гардан авсан.

Геофизикийн салбар 2 мэргэшсэн инженерээр хүрээгээ тэллээ. Та бүхэнд ажлын өндөр амжилт хүсье

“Шилдэг залуу геофизикч” шагналын эзэн болсон Э.Батмагнай, 2023 он

 “МГеофХ”-ны нэрэмжит “Шилдэг залуу геофизикч” шагналын эзэн болсон Э.Батмагнайдаа баяр хүргэж, ажлын өндөр амжилт, сайн сайхан бүхнийг хүсье

Чалхаан овогтой Баянсан ах Алтангадас одонгоор шагнагдсан.

Чалхаан овогтой Баянсан ах Алтангадас одонгоор энгэрээ мялаасан түүхэн үйл явдал болж байна. Эрүүл энх, сайн сайхан бүхнийг хүсье

Геофизик-30 жил арга хэмжээ маш сайхан болж өндөрлөлөө. 2023 он

ГЕОФИЗИК-30  /2023.11.17/

Монголын Геофизикчдийн холбоо (ГҮТББ) үүсэн байгуулагдсан 30 жилийн ой,

Эх орондоо дээд боловсролтой геофизикчид бэлтгэж эхэлсний 30 жилийн ой

ЗАСГИЙН ГАЗРЫН ХЭРЭГ ЭРХЛЭХ ГАЗРЫН ЗАСГИЙН ГАЗРЫН РЕФЕРЕНТ Д.БОЛД

  

    Д. Болд нь ОХУ-ын Екатеринбург хотын /хуучин нэрээр Свердловск хот / Уул уурхайн Улсын их сургуулийн геофизикийн факультетыг уулын инженер-геофизикч мэргэжлээр 1981-1986 онуудад суралцан төгссөн, 1986 оноос хойш төрийн байгууллагад тасралтгүй 37 дахь жилдээ техникч-геофизикч, инженер-геофизикч, геомэдээллийн төвийн дарга, экспидeцийн дарга, агентлаг, яаманд мэргэжилтэн, ахлах мэргэжилтэн, олон улсын төслүүдийн удирдагч, хэлтэс, албаны дарга, Засгийн газрын референтээр ажиллаж байна.

    Мэргэжлийн ур чадвар: мэдээллийн систем анализ, программ хангамж, 3 хэмжээст дүрс боловсруулалт, хиймэл дагуулын мэдээлэл боловсруулалт, олон улсын төслийн менежемeнт, геологи, уул уурхай, газрын тосны чиглэлээр хээрийн судалгааны ажлын туршлагатай. Орос, англи, франц хэлний мэдлэгтэй.

    1986-1990 онуудад Дорнод аймгийн Баянтүмэн сумын нутагт орших Баянцагааны хүдрийн дүүргийн хэмжээнд 1500 км.кв талбайд 1:50000-ны масштабын зураглалын ажил, Төв, Булган, Архангай аймгуудын нутаг дэвсгэрт 16700 км. кв талбайн хэмжээнд 1:50000-ны масштабын 5 сувагт агаарын геофизикийн судалгааны ажилд ЗХУ-ын мэргэжилтнүүдтэй хамтран хайгуулын геофизикчээр ажилласан.

    1987-1988 онд АА-ын дугаар ангид цэргийн алба хааж бага түрүүч цолтой халагдсан.

 1990-1993 онуудад Геологи-геофизикийн эрлийн нэгдлийн дэргэд байгуулсан Геомэдээлэл, тандан судалгааны төвд мэргэжилтнээр томилогдон ажиллаж геологи, геофизикийн төрөлжсөн программуудын алгоритмыг Basic, Qbasic, Fortran, C хэлээр зохиож, мэдээлэл боловсруулах болон сансрын зургийн боловсруулалтын мэдээллийг геологи, хайгуулын ажилд хэрэглэх талаар заавар гаргаж, геологийн салбарын байгууллагуудын  нийт инженер техникийн ажилтнуудад 8 ба 16 битийн компьютер, түүний хэрэглээ, дүрс боловсруулалтын системийг хэрхэн ашиглах талаар төрөлжсөн хичээлүүдийг боловсруулан зааж байсан. 

     1993 оны 4 дүгээр сард Монгол Улсын геологийн салбарын анхдагч төрийн бус байгууллага болох “Монголын геофизикчдын холбоо”-г санаачлан байгуулж гүйцэтгэх захирлаар ажиллаж байсан.   

Эрдэм шинжилгээний хурлын хөтөлбөр, 2023 он

 

Геофизик-30, Баярын хүлээн авалт, 2023 он

 

Геофизик - 30 жил

Монголын Геофизикчдийн Холбоо (ГҮТББ) үүсэн байгуулагдсаны 30 жил, Үндэсний дээд боловсролтой геофизикч бэлтгэж эхэлсний 30 жилийн ойд зориулсан эрдэм шинжилгээний хуралд та бүхнийг өргөнөөр хүрэлцэн ирэхийг урьж байна.

Олон улсын хурал зөвлөгөөнд оролцдог Монгол геофизикчдийн төлөөлөл

 Олон улсын хурал зөвлөгөөнд оролцдог Монгол геофизикчдийг төлөөлүүлэн "Mongolian Geophysical Society" нэртэй цахим архивын түүхэн гэрэл зургийн альбомоос эргэн дурслаа.

Зураг түүх өгүүлнэ https://geophysicsmn.blogspot.com/p/picture-of-history.html

"Шилдэг залуу геофизикч" шалгаруулах, 2023 он

 

Геофизикч /шүлэг/

 

Спорт өдөрлөг 2023

 

"ГЕОФИЗИКИЙН ШИНЖЛЭХ УХААН, ТҮҮНИЙ ХЭРЭГЛЭЭ" сэдэвт илтгэлийн уралдаан

ТАНЫ БОДЛООР АШИГТ МАЛТМАЛ, ГАЗРЫН ТОСНЫ ГАЗАРТ ГЕОФИЗИКИЙН ХЭЛТЭС БАЙГУУЛАХ ХЭРЭГЦЭЭ БАЙНА УУ?

Өнөөдөр би Монголын геофизикчид болон геофизикийг ойлгодог геологийн салбарын мэргэжилтнүүдээсээ “Таны бодлоор Ашигт малтмал, газрын тосны газарт Геофизикийн хэлтэс байгуулах хэрэгцээ байна уу?” гэсэн асуултыг асуухыг хүслээ.

Энэ асуултанд идэвхтэй хариулж, сошиал орчинд үзэл бодлоо бичих байдлаар Монголын геофизикийн салбарын хөгжилд үнэтэй хувь нэмрээ оруулаасай гэж та бүхнээсээ хичээнгүйлэн хүсэж байна. Би ч бас энэ асуултанд хариулъя.

Монголын геологийн салбар үеийн үед хялбар, хямд аргаар хэтийн төлөвтэй объектыг илрүүлэх нөхцөлтэй геологийн судалгааг хийсээр ирсэн. Гадаргууд ойрхон ордуудыг эрчимтэй нээн илрүүлж, олборлож байгаа цаг үед бидний дараагийн эрчимтэй хөгжих үе шат бол яах аргагүй газрын гүн рүү хэдэн зуун метрээс хэдэн километрийн мэдээллийг геофизикийн судалгааны үр дүн дээр үндэслэн эрж хайх явдал мөнөөсөө мөн. Иймд би дээрх асуултанд 100% хэрэгтэй байна гэж хариулах болно.

Геофизикийн хэлтэс нь үндсэндээ Геофизикийн өгөгдлийг цаг хугацаанд нь дахин хэрэглэх боломжтой байдлаар шаардлага хангахуйц хэмжээнд цуглуулах, боловсруулах, тайлал хийх, хянах, хэрэглээнд нэвтрүүлэх үүрэгтэй ажиллах шаардлагатай байна. Өнөөдөр Ашигт малтмал, газрын тосны газарт геофизикийн хэлтэс байхгүй ч эдгээр ажлууд хийгдсээр байна. Гэхдээ геофизикийн хэмжилтийн үр дүнг дахин ашиглах, нэгтгэх, геологийн мэдээлэлтэй уялдуулж бүрэн дүүрэн ашиглах ажил хоцрогдолтой байсаар байна.

Үүний нэг тод жишээ бол манайд ноёрхож байсан хуучин техник-технологийн тусламжтай хийсэн, үнэ өртөг шингэсэн ажлын анхдагч материал буюу Ашигт малтмал, газрын тосны газарт байгаа тухайн үеийн сейсмийн анхдагч өгөгдлийг ашиглаж чадахгүй, хадгалалтын горим алдагдан эвдэрч гэмтсээр, цаашилбал хаягдах хүртэл аюул нүүрлэсэн байна. Эдгээр анхдагч материалуудыг орчин үеийн дэвшилтэд программ хангамжаар дахин боловсруулах гарц гаргалгааг олон, дахин ашиглаж чадвал хайгуулын ажилд зарцуулах байсан хэтийн зардлыг эрс бууруулах ба түүнд зарцуулах байсан зардлын өчүүхэн хэсгээр нь их хэмжээний геофизикийн мэдээллийн сантай болох боломжтой. Энэ асуудлыг геофизикийн хэдхэн мэргэжилтэн шийдэх боломжгүй. Иймд Геофизикийн хэлтэс зайлшгүй шаардлагатай байна. Геофизикийн хэлтэс иймэрхүү тулгамдсан асуудлыг хөндөж байх, шийдэх гарцуудыг олох, төсөл бичих, тендер зохион байгуулах гээд геофизикийн зохих арга хэмжээг илүү хурдацтай авч, ажил хэрэг болгож чадах болов уу? Дахин ийм асуудал тулгамдахгүй байх тал дээр төвлөрч, цаашид илүү үр дүнтэй ажиллах болов уу? Геофизикийн хэлтэстэй болчихвол энэ мэтчилэн давуу тал олон байх юм шиг санагдаад үзэл бодлоо илэрхийллээ.

 Нэгэнт дэлхийн геологийн салбарын хөгжил гүний судалгаа руу эрчимжиж байгаа өнөө үед бид Ашигт малтмал, газрын тосны газрын геофизикийн мэдээллийн сан бүрдүүлэлт болон геофизикийн судалгааны ажлын ололт амжилт, давуу тал, сул тал, дутагдалтай тал, хүндрэлтэй байгаа асуудлуудын талаар нээлттэй сошиал орчинд хэлэлцэх цаг үе нь мөн гэж бодож байна. Хэрвээ энэ бичвэрийн үр дүнд “ТАНЫ БОДЛООР АШИГТ МАЛТМАЛ, ГАЗРЫН ТОСНЫ ГАЗАРТ ГЕОФИЗИКИЙН ХЭЛТЭС БАЙГУУЛАХ ХЭРЭГЦЭЭ БАЙНА УУ?” гэх асуулт цагаа олсон зөв асуулт гэж олонхын санал нэгдэж байгаа нь ажиглагдвал, салбараа гэх сэтгэлтэй геологийн салбарын мэргэжилтнүүдийн үнэтэй үзэл бодлуудад үнэлэлт дүгнэлт хийн, Монголын геофизикчдийн төлөөлөл болсоор ирсэн “Монголын геофизикчдийн холбоо” шаардлагатай арга хэмжээг авч, хандах газруудад албан ёсоор уламжилж өгөн гэдэгт итгэлтэй байна. Мэдээж энэ асуудлыг “Монголын геофизикчдийн холбоо” удаа дараа хөндөж байсан түүхтэй боловч тухайн үед хүчээ авч чадаагүй, тодорхойгүй шалтгаануудын улмаас өнөөдөр бийллээ олоогүй байгаа нь ил тод байна. Иймд олонхын хүчийг авах зорилготой сайн дураараа энийг бичсэнийг зөв өнцгөөс нь эерэг хандлагаар хүлээн авч уншаасай гэж эрхэм хүндэт мэргэжилтэн та бүхнээсээ хүсэж байна. Хэрвээ буруу зөрүүтэй мэдээлэл бичсэн байвал залуу геофизикч намайг өршөөн соёрхохыг бас хүсье.

АНХААРАЛ ТАВЬСАН ТА БҮХЭНД БАЯРЛАЛАА

Хүндэтгэсэн: “Монголын геофизикчдийн холбоо”-ны

Удирдах зөвлөлийн гишүүн А.Болор-Эрдэнэ

2023 оны 06-р сарын 08-нд

ГЕОФИЗИКИЙН МЭРГЭШСЭН МЭРГЭЖИЛТНИЙ СУРГАЛТ - 2023 он

ГЕОФИЗИКИЙН МЭРГЭШСЭН МЭРГЭЖИЛТНИЙ СУРГАЛТ танхим, цахим хосолсон хэлбэрээр явагдаж дууслаа. Сургалтын удиртгал хичээл, шалгалт авах, тайлан төсөл хамгаалах ажил танхимаар явагдсан. Сургалтын нээлт болон шалгалт авах, төсөл тайлан хамгаалахад УУХҮЯ болон МГХНЗ-ийн төлөөлөл оролцсон.

Монголын геофизикчдийн холбоо (ТББ)-ны Удирдах зөвлөлийн гишүүн А.Болор-Эрдэнэ

Дорноговийн хотгорын петрофизикийн загвар, түүний геолог-структурийн онцлог /1989.03.18/

1989 оны 3 сарын 18-ны өдрийн ЭХУУҮГЯ-ны харьяа ЭРЭЛ ГЕОФИЗИКИЙН ЦОГЦОЛБОР ЭКСПЕДИЦИЙН техникийн зөвлөлийн хурлын проткол. Газрын тосны түвгэр. тогтоцын эрэлд ВЭЗ-VES ийн боловсруулж гаргасан КН-2үе-КН загвар хэрэглэх тухай.

Эх сурвалж: МУ-ын Зөвлөх инженер Ц.Түдэв

ЭМГЭНЭЛ

 

Рахатжангийн ХОВДХАН

 (1944-2023)

 

Геологийн салбарын ахмад ажилтан, геофизикч Р.Ховдхан ертөнцийн мөнх бусыг үзүүлж, бид бүхэнд нөхөж баршгүй хүнд гарз тохиолоо.

 

           Р.Ховдхан Баян-Өлгий аймгийн Сагсай сумын нутагт малчин ардын гэр бүлд төрж, аймгийн нэгдүгээр 10 жилийн дунд сургуулийг 1962 онд төгссөн. ЗХУ-ын Ташкент  хотын Политехникийн дээд сургуулийн Геологийн факультетэд суралцаж “уулын инженер геофизикч” мэргэжил эзэмшсэн.

 

Р.Ховдхан нь “ЭРЭЛ ГЕОФИЗИКИЙН ЦОГЦОЛБОР ЭКСПЕДИЦИ”-ээс хөдөлмөрийн гараагаа эхлэн, 1968-1992 онуудад тус экспедицэд инженер, ахлах инженер,  ангийн дарга, 1992 оноос хувийн компаниудад ахлах геофизикч, зөвлөх геофизикчээр ажиллаж байсан.

 

Эрдэс баялгийн салбарт 50 гаруй жил ажиллахдаа геологийн зураглал, эрэл, хайгуул, ашиглалтын бүх үе шатанд төсөл төсөв зохиолтоос үр дүнгийн тайлан зохиолцон, хамгаалах хүртэл хээрийн судалгааны ажил, суурин боловсруулалтын ажлыг удирдан, зохион байгуулж, амжилттай хэрэгжүүлж ирсэн үйлдвэрлэлийн арвин их туршлагатай ахмад ажилтан байсан. Улсын геологийн фондод түүний зохиолцсон 20 орчим үр дүнгийн хадгалагдаж байна. 

 

Төв болон өмнөт Монголд тархсан нүүрсний орд, илрэлүүд болон газрын тос /нефть/, газрын гүн дэх усны судалгааны геофизикийн ажлуудыг удирдан хэрэгжүүлэхдээ цахилгаан хайгуул болон чичирхийлэл /сейсм/-ийн арга, аргачлалуудыг оновчтой сонгон хэрэглэж, боловсруулалт тайлалт хийн, тогтоогдсон баялаг, нөөцийн хэмжээг гүн дэх мэдээллээр нь ихэсгэн нэмэгдүүлэх, Монгол инженерүүд өөрсдийн хүчээр газрын тосны судалгааны ажлыг хийх үндэс суурийг тавьж, эхлүүлсэн зэргээр үр бүтээлтэй ажиллаж ирсэн. Тухайлбал: Унгарын улсын геофизикчидтэй хамтран Шаргын говь, Хүйсийн говьд газрын тосны судалгааны ажлыг гүйцэтгэн, анхдагч мэдээллийг бүрдүүлсэн. Таван толгойн ордын хайгуул хийж байх он жилүүдэд геофизикийн цахилгаан хайгуул болон сейсмийн эрлийн ажлаар ордын гүний усны болон нүүрсний давхаргуудыг тогтоож хайгуулд шилжүүлсэн нь одоогоор ашиглагдаж байгаа бөгөөд ард иргэд бид үр өгөөжийг нь хүртсээр байгаа билээ.

 

Ахмад ажилтан Р.Ховдхан нь геофизикийн сейсмийн арга аргачлалаар нарийн мэргэшсэн, орос хэл, англи хэлний өндөр мэдлэгтэй, түүний эрдэс баялгийн салбарт оруулсан хувь нэмэр, түүний хөдөлмөрч, хичээнгүй, шулуун шударга зан чанар, гэгээн дүр нь бидний сэтгэлд үүрд хоногшин үлдэх болно.

 

Талийгаачийн гэр бүл, үр хүүхэд, төрөл төрөгсдөд гүн эмгэнэл илэрхийлье.

 

 

МОНГОЛЫН ГЕОФИЗИКЧДИЙН ХОЛБОО

ЭРЭЛ ГЕОФИЗИКИЙН ЦОГЦОЛБОР ЭКСПЕДИЦИ

Угсардаг Монгол гэрийн танилцуулга

Монгол геофизикчдийн ухаанаар зохион бүтээгдэж, геологи болон хайгуулын ажилд 2014 оноос хойш ашиглагдаж байгаа энэхүү угсардаг гэр нь овор хэмжээ бага тул барьж буулгахад хялбар, мөн тээврийн зардлыг хэмнэх ач холбогдолтой.

Хураасан гэрийн овор хэмжээ нь Ланд-н ачаан дээр багтана. Нэг гэр 6 талтай ба 110-120кг жинтэй.

Зохион бүтээсэн геофизикийн компани: ДашМагИнж ХХК

Монголын геологичдын улсын анхдугаар зөвлөгөөн

 Сайн байцгаана уу. Та бүхэнд энэ өдрийн мэндийг дэвшүүлье.

Монголын геологичдын улсын анхдугаар зөвлөгөөн тун удахгүй болох гэж байгааг та бүхэнд мэдэгдэж байна. Энэхүү арга хэмжээний хүрээнд Ашигт малтмалын тухай хуулийн шинэчилсэн найруулгын төсөл, Газрын хэвлийн тухай хуулийн шинэчилсэн найруулгын үзэл баримтлалын төсөл, геологийн судалгаа, ашигт малтмалын хайгуулын ажлын үед орон нутгийн зүгээс үзүүлж буй сөрөг нөлөөлөл зэргийг хэлэлцэх болно.

Иймд Монголын геологичдын улсын анхдугаар зөвлөгөөнийг өндөр үр дүнтэй ажил болгон хэрэгжүүлэхэд таны болон салбарын хамт олны дэмжлэг туслалцаа, хамтын ажиллагаа нэн чухал бөгөөд та бүхний өгөх санал салбарын хөгжилд томоохон түлхэц өгнө гэдэгт бид итгэж байна.

Дараах холбоос линкээр дамжин орж дэлгэрэнгүй мэдээлэл авахыг хүсье.

“АШИГТ МАЛТМАЛЫН ТУХАЙ ХУУЛИЙН ШИНЭЧИЛСЭН НАЙРУУЛГЫН ТӨСӨЛД САНАЛ АВАХ ТУХАЙ” 

Хамрах хүрээ

Уул уурхай, хүнд үйлдвэрийн яам

Үндэсний геологийн алба

Ашигт малтмал газрын тосны газар

Монголын геологийн холбоодын нэгдсэн зөвлөл

Салбарын төрийн болон хувийн хэвшлийн байгууллагуудын төлөөлөл

ҮГА, АМГТГазруудын санаачилгыг дэмжиж, хамтран ажиллахыг хүсье.

Хэрэглээний геофизик 1

Хүн төрөлхтий үндсэн гурван төрхтний нэг монголчууд тооны хувьд цөөхөн хэдий ч тодорхой цаг үед дэлхийн хагасыг эзэгнэж явсан тоотой хэдхэн үндэстний Эрэлхэг зоригтой, ухаант энэ ард түмний үр хойчистоо өвлүүлсэн газар нутаг хүний хэрэгцээт бүхий л эрдэс баялагтай билээ. Энэ их баялгийг нээж илрүүлэх хайгуул судалгааны ажил нь монгол орны газар нутгийн багахан хэсгийн хэдхэн зуун метрийн гүнийг хамарсан байдаг тул хөрсөн доорх эрдэс баялаг, ашигт малтмалаа нээн илрүүлэх , ашиглах алтан түлхүүр нь геологич, геофизикчдийн эзэмшсэн мэдлэг чадварт байдаг. Орчин үеийн техник технологийн дэвшлийн эрин үед дэлхийн зах зээл дээр эрдэс баялгийн хэрэгцээ улам бүр нэмэгдэж, үнэ цэнэ нь ч өдрөөс өдөрт өсч , гадаадын уул уурхайн томоохон компаниуд энэ салбарт хөрөнгө хүч оруулахааар геологи, геофизикийн хайгуул судалгааны ажил урд хожид байгаагүйгээр эрчимжсэн энэ цаг үед үндэсний мэргэшсэн геофизикчид улс оронд ус агаар шиг хэрэгтэй байна.

Хэрэглээний геофизик 1 - онлайн захиалах линк

Хэрэглээний геофизик 2

Геофизикийн судалгааны ' Зориудын туйлшралын онол'-ыг би хэдэн жил судалсны эцэст 1984 онд бүрэн тайлж яадсан билээ. Харин 1992 онд Цахилгаан босоо тандалтын хэмжилтйн муруйг ' Шугаман бус аргаар' -аар боловсруулалт хийж болохыг шинээр гаргаж, практикт нэвтрүүлснээр газрын гүний уст үеийн тухай мэдээлэл алдаа мадаггүй гарах үндэс болсон юм.Хоорондоо нягт уялдаа бүхий онол-практикийн энэ аргыг мэргэжил нэгт нөхдөдөө хүргэхээр шийдсэн минь энэ билээ.

Хэрэглээний геофизик 2 - онлайн захиалах линк

ЭМГЭНЭЛ

 

ПҮРЭВИЙН ДУГАРАА

(1943-2022)

Монголын геофизикийн шинжлэх ухааны салбарын ерөнхийлөгч, ШУТИС-ын Геологи, Уул Уурхайн Сургуулийн Геофизикийн сургалт, үйлдвэрлэл, судалгааны төвийн захирал, ШУТИС-ийн хүндэт профессор, Геологи-эрдэс судлалын ухааны доктор, профессор, МУ –ын зөвлөх инженер Пүрэв овогтой Дугараа 2022 оны 12 дугаар сарын 25-ны өдөр зуурдаар нас барж Монголын геологийн салбарт нөхөж баршгүй гарз тохиолоо.

         П.Дугараа 1943 онд Ховд аймгийн Булган суманд малчин ард Пүрэвийн  ууган хүү болон төрсөн ба Ховд аймагт ерөнхий боловсролын сургууль, Зөвлөлт холбоот улсын Москва хотод Ломоносовын их сургуулийг Геологич-геофизикч мэргэжлээр төгссөн байна. Тэр Эрхүүгийн Политехникийн дээд сургуульд техникийн ухааны докторын зэрэг хамгаалсан,  манай оронд геофизикийн шинжлэх ухааныг хөгжүүлэх, нутагшуулах, дэлхийн түвшинд авч явахад олон жилийн бүтээлч хөдөлмөрөө зориулсан шилдэг эрдэмтэн, сурган хүмүүжүүлэгчдийн нэг байлаа.

Түүний санаачлага, оролцоотойгоор ШУТИС (ТИС)-д “Ашигт малтмалын эрэл, хайгуулын геофизик” мэргэжлээр бакалавр, магистр, докторын шаталсан сургалттайгаар мэргэжлийн геофизикчдийг бэлтгэж эхэлсэн байна. П.Дугараагийн шууд удирдлагын дор МУИС, ПДС-ийн дэргэд “Геофизикчдийн мэргэжлийн баг” бүрэлдэн бий болсон ба “Хайгуулын геофизикийн лаборатори”–ийг байгуулсанаар өндөр мэргэжлийн геофизикчид бэлтгэх ажил шинэ шатанд гарсан байдаг. Ийнхүү МУИС-ийн физик, цаг уур, геологи, газарзүйн салбарын мэргэжлээр дээд мэргэжлийн боловсон хүчин бэлтгэхэд эрэл, хайгуулын геофизикийн аргуудын онолын үндэс, практик хэрэглээний талаар сургалт, судалгаа, үйлдвэрлэлийн ажлыг явуулах үндэс суурь тавигдсан нь профессор П.Дугараагийн нэртэй шууд холбоотой. Өнөөдөр тус сургуулийг төгссөн олон зуун мэргэжилтэн, эрдэмтэн судлаачид манай орны нийгэм, эдийн засгийн бүхий л салбарт үр бүтээлтэй ажиллаж байна.

П.Дугараа Монголын геофизикчдийн холбоог үүсгэн байгуулагчдын нэг бөгөөд олон жил холбооны гүйцэтгэх захирлаар сонгогдон ажиллаж мэргэжлийн холбоо, иргэний байгууллагын үйл ажиллагааг төлөвшүүлэхэд үнэтэй хувь нэмэр оруулсан юм. П.Дугараа сургалт судалгаа, эрдэм шинжилгээний ажлын зэрэгцээ үйлдвэрлэлд ажиллаж буй  залуу боловсон хүчнийг сургах, тэдэнд ажил, амьдралын арга барил олгоход сэтгэл харамгүй тусалдаг, хамт олны дунд өндөр нэр хүндтэй, манай орны эрдэс баялгийн судалгаа, олборлож ашиглах үйл хэрэгт өөрийн амьдралаа зориулсан ахмад туршлагатай хайгуулчдын нэг байлаа.                         

П.Дугараагийн олон жилийн бүтээлч хөдөлмөрийг үнэлж, Сүхбаатарын одон  (2009), Хөдөлмөрийн гавъяаны улаан тугийн одон (2012), Алтан гадас одон (2001), хөдөлмөрийн хүндэт медаль (1976), Ардын хувьсгалын 60,70, 80 жилийн ойн медаль, Их Монгол улс байгуулагдсаны 800 жилийн ойн медаль (2006), Монголын Бүтээлч Иргэдийн Нэгдсэн холбооны Монгол гайхамшиг “Алтан хүн” одон, Эрчим хүч, уул уурхайн үйлдвэр, геологийн яамны “Тэргүүний геологич”, Боловсролын яамны “Ардын боловсролын тэргүүний ажилтан”, ШУА -ын “Шинжлэх ухааны тэргүүний ажилтан”, Үйлдвэр, худалдааны яамны “Газрын тосны тэргүүний ажилтан” болон ЗХУ-ын “Отличник разведки и охраны недр” (1981) цол тэмдэг, Геологийн салбарын ойн медалиудаар тус тус шагнажээ.

Монголын геологи, уул уурхай, газрын тосны салбарт “Дугараа багш” хэмээн хүндлэгдсэн эрхэм нөхрийн маань гэгээн дүр, ажилч хичээнгүй чанар, найрсаг зан харьцаа бидний сэтгэл зүрхэнд үүрд үлдэх болно.

 

 Ум сайн амгалан болтугай.

Монголын Геофизикчдийн холбоо